主頁 > 酒釀生活

學習品酒的原因(三)

作者: LUIS YIP

今期我們繼續探討多期之前的受歡迎題目之一: 學習品酒的原因!為了令大家更加投入有共鳴,小弟繼續用口語的對話方式演繹:

第五位: 因為社交需要,想有更多話題

我:「 點解嚟學品酒呀?」
學員:「因為我成日都出席聚會飲紅酒,想識得同人講呢方面話題!」
我:「 即係有社交需要,想有更多話題啦!?」
學員:「係!成日都唔明出席聚會就要飲紅酒,又唔識點欣賞啲紅酒,同啲專家一齊飲搭唔到嘴……」
我:「其實而家好多餐飲場合或者一啲宴會,都必定用上葡萄酒飲用,除咗感覺較為高貴優雅亦有生活品味之外,(我心想當然大部份呢啲表面嘢係扮曬嘢㗎喇!但係始終上緊堂,要包裝言語,哈哈!)就係想大家揸住酒杯底傾計,亦都係喺比較輕鬆嘅氣氛底下暢所欲言。如果你對品酒有一定認識亦都可以同好多唔同嘅在場人士講下酒經去打開話題,尤其是同啲鬼佬同埋飲家一齊飲住去傾計,可霎時間打破隔膜,極速變friend~所以識品酒係絕對可以幫助到社交㗎~」

第六位: 品酒可以識好多朋友

我:「做乜嚟學品酒呀?」
學員:「阿sir,學識品酒之後係咪會識多咗好多朋友㗎?我就係想飲酒識人~」
我:「 嘩!呢個完全係我嘅品酒理念,就係以酒會友!不過咁,要講清楚一樣嘢: 如果你想去飲酒識朋友,去酒吧老蘭都一定識到一大堆,仲可以好快識到唔同國籍嘅人,簡單講你想溝仔溝女,嗰啲地方或者比較適合你呢個諗法。
但係如果真係想識一啲大家都想提升生活品味或者對品酒有研究嘅志同道合呢啲酒肉朋友,你真係可以識到好多,因為坊間有好多唔同嘅品酒聚會包括試酒會(Wine Tasting)、葡萄酒晚宴(Wine Dinner)等等畀你參與,透過品酒真係可以識到唔同階層嘅人,係幾好玩嘅一種社交活動。」

以上對話內容係真有其事,回答方式純屬小弟個人觀感,並不一定是指定答案或「啱聽」的答案,請大家當作娛樂閱讀一下、輕鬆一下、了解一下就可以了!下次有機會我們一起再探討學習品酒的原因!

LUIS YIP
路易三十
從事葡萄酒行業多年,
可是睇得唔打得,
亦都吹得唔飲得;
學習做品酒顧問,
創造驚喜一陣陣!

不愛飲酒,但愛試酒!以酒會友,會友品酒!




 

收貨人 :
:
:
 
 
xxx