主頁 > 酒釀生活

學習品酒的原因(五)

作者: LUIS YIP

來到最後一期「學習品酒的原因」,憶述完最後兩個就會寫完了這個題目,總共十大原因!雖然這十個原因不是官方數據或大型調查研究所得,但這是我過去幾年從400多個品酒工作坊(Wine Tasting Workshop),訪問了超過2000名學品酒的朋友所得知的原因,亦憑我記憶節錄,數據不代表業界大眾也可以代表小眾吧!所以我覺得應該有參考價值的。

第九位: 想了解葡萄酒行業搵商機

呢個原因都係葡萄酒喺香港免稅之後,不斷增多朋友學習品酒。免稅喎!呢個咁大嘅優勢,降低咗好多成本自然就令好多人想創業或投身呢個行業啦,所以不少從事食品、製衣、物流、貿易或經營餐廳的朋友都想轉行或多增這盤生意,甚至乎上堂都係想偷師或找尋合作商機。

我:「請問點解嚟學品酒呀?」

貌似老闆的中年男子:「我其實準備開餐廳,所以都想學下葡萄酒嘅知識,方便我入貨同埋Wine & Food Pairing!」

另外一位感覺比較草根啲嘅中年漢:「冇呀!我哋做物流嘅橫掂都運開嘢,想搵埋紅酒嚟做啫!」

有一位叔叔插咀講:「我做製衣嘅而家夕陽行業喇,所以都要轉行揾定後路啦!冇咩嘢做咪試下賣酒囉!」

我:「嘩!各人都有不同嘅背景,大家都係搵錢啫,所以從事呢個行業都係另外一個方式去謀利!不過有樣嘢想提醒大家,就係做我呢行一定要超有熱誠,如果你當普通飲品咁轉售就肯定瓜老襯!另外要有私人客戶,仲要係專攻內地市場,唔肯返大陸做就生意好極都有限,不如唔好做!最重要係大家都係嚟學初階級嘅品酒知識,我唔會教大家做生意亦冇資格教大家做生意,了解咗基本入門嘅葡萄酒知識先啦,可能你有唔同嘅睇法。」

佢哋不約而同地點頭微笑,應該都係畀我呢番道理說服咗而乖乖聽話上堂,之後仲好有耐心聆聽、互相交流最後成為朋友。(笑)

第十位: 朋友介紹所以來學

最後一個原因其實係歸咎於有良好口碑,亦都係我做得非常之好嘅宣傳方式就係朋友介紹。

我:「呢位靚女你好年青㗎喎!咁年青就嚟學品酒,點解呢?」

年輕美女學員:「我同朋友成日都會飲下酒gathering,有朋友上過你堂話你講得好好!咁咪介紹我嚟學囉!」

我:「……Really!?(我個樣冇笑,但個心微笑!沾沾自喜,好有滿足感!) 好呀!多謝你同你朋友支持呀!希望我都幫到你,冇令你失望,等你又介紹其他朋友嚟上堂啦!」

最後終於全部十大原因都敘述了,無論你有什麼原因來學品酒,我都衷心感激你!因為我們有緣相識,我可以為你打開進入葡萄酒世界的大門,亦很榮幸令到上課的朋友認識到葡萄酒的基本知識,從而促進葡萄酒業界的生意!為社會有所貢獻; 為大家增值,教學相長,以酒會友。

 

LUIS YIP
路易三十
從事葡萄酒行業多年,
可是睇得唔打得,
亦都吹得唔飲得;
學習做品酒顧問,
創造驚喜一陣陣!

不愛飲酒,但愛試酒!以酒會友,會友品酒!

 

收貨人 :
:
:
 
 
xxx