一對情侶從拍拖之前既噯昧期到拍拖初期，都會因為新鮮感而有講唔完既話題，但一齊得越耐，兩人之間既互動就會越黎越似例行公事，每日send訊息既內容就係『做緊咩』『食左咩』『收工未』等既『打卡式』傾計，難免令人覺得枯燥乏味。唔知拍緊拖既大家有無同感呢？有單身網民就開post表示想了解下，到底拍拖需唔需要每日覆msg?
有網民就留言指自己已經拍緊第6年拖，同另一半已經唔知有咩好傾，雖然互相都有分享下影片，但興趣都不大，仲話以前都會喺IG互相Send下片交流下，宜家就連睇都廢事，Whatsapp都係打卡式傾計，唔知係咪就黎要被分手…睇黎都係每對情侶都必經既平淡期。但亦有網民就相反，話自己同對方會日日傾，雞毛蒜皮小事都講一餐，又話雖然成年人就係每日翻工放工，但每日都總有啲唔同既。亦有網民覺得『msg都唔覆不如唔好拍拖啦』，其實都有道理，兩個人一齊都係需要溝通，msg都唔覆同單身有咩分別呢？
有網民就理性派，認為平靜期就要大家傾下點做『起碼要搵出原因，係雙方好攰定個話題唔啱，要改下溝通方式，如果大家對對方已經無曬好奇心同分享欲，以後點行到一世？』
另外有網民就發表咗好有哲學性既言論，佢就認為情侶之間唔洗特登去搵話題，只要自己去發掘一下新興趣、新認知，時常增值自己，自然就會有新話題新事物去互相分享。佢又提出雙方應該單刀直入咁傾下，拍咗咁耐拖，係應該要有一個新既章節，又用打機做比喻『你打機打七年唔會都係打頭幾話下嘛』，可以同對方建立一個新計劃，或者同對方分享一個新計劃，人會成長而關係都需要昇華，唔可以只係講日常，要有deep talk。
除左要有deep talk之外，如果想keep住每日都好似熱戀期咁sweet，發訊息既時候都可以用少少技巧，小編就搵咗幾句簡單又可以令感情升溫既說話，大家可以參考一下：
- 『我等埋你先瞓』
另一半出咗街未番屋企，或者OT遲咗放工，願意等埋對方先瞓覺，可以展示到你對佢既擔心同著緊。 - 『其實食咩都無所謂，最緊要係同你食』
情侶日常通常都係問『食咩好？』，下次不妨比啲新意咁樣覆，其實食咩都唔係重點，最緊要係同邊個食！ - 『做緊咩呀你？』
突然間收到呢句都幾窩心，因為會感覺到對方係真心關心你既日常生活，又可以主動開話題。 - 『我覺得你好叻』
可以經常讚美對方，呢種讚美唔係指好膚淺既『你好靚』『你好型』，而係從心底欣賞對方既讚美，例如對方成功完成咗某啲目標，或者做咗啲令你刮目相看既嘢，你對佢既讚美都要講出口。 - 『好多謝你無論發生咩事都喺我身邊』
面對面講感謝既說話可能會好尷尬，咁就不如用文字表達，一段感情裡面要時刻向對方表示感謝，因為沒有人有義務要為你做事，對方是出於愛先不求回報，所以你對佢既感謝可以令佢知道佢唔係單方面付出。 - 『希望之後每一個生日都可以同你過』
呢一句可以比對方知道你希望將來都會有對方既陪伴，絕對唔係玩玩下！
